Cierto produccion di e remedi di sucu Glucient® SR 500mg saca for di mercado na Aruba.
Inspeccion di Salud Aruba (IVA) a ricibi notificacion cu un cierto produccion (batch) di e remedi di sucu metformine a wordo saca for di mercado.
Inspeccion di Salud Aruba (IVA) a ricibi notificacion cu un cierto produccion (batch) di e remedi di sucu metformine a wordo saca for di mercado. E produccion di remedi a wordo saca for di mercado door cu den e materia prima di e remedi (metformine), a haya un nivel mucho halto di e kimico N-Nitrosodimethylamine (NDMA). NDMA ta un kimico cu probablemente por causa cancer. Sinembargo e riesgo pa haya cancer door di uza un remedi cu ta contamina cu NDMA ta hopi chikito.
Na Aruba, solamente e remedi metformine cu ta wordo duna cu receta bou nomber di Glucient® di e fabrica Consilient Health/Goodlife Pharma a wordo saca for di mercado. Tin remedinan di metformine di otro fabricanan tambe cu un cierto produccion contamina, pero na Aruba e produccion contamina aki no a wordo importa. Pues pashentnan na Aruba cu otro marcanan di e remedi metformine por sigui bebe esaki normalmente y no mester haci nada.
Den e caso cu un pashent a ricibi un produccion di e remedi Glucient® SR 500mg cu tabata contamina, e botica mes a tuma contacto cu e pashent pa entrega e remedi aki bek. Segun informacion ricibi di e botica, un cantidad chikito di persona mester a entrega nan remedi bek.
Si bo ta uza e remedi Glucient® SR 500mg, IVA kier a avisa tur pashent pa por fabor controla e siguiente ‘charge/lot nummers’ riba bo paki di remedi: 3081844, 3081845, 3081846. E ‘charge/lot nummer’ por haya na banda riba e paki di remedi (mira e potret adhunto pa un ehempel). Solamente si bo remedi ta cuadra cu e ‘charge/lot nummers' menciona akiriba y bo no a wordo contacta door di bo botica, mester tuma contact cu bo botica pa entrega esaki. Eynan lo ricibi mas informacion di e boticario.
E Inspectora di Remedi, sra. Roselynn Angela, ta pidi tur pashent cu tin pregunta y/of un preocupacion pa nan tuma contacto cu nan botica. Inspectie Volksgezondheid Aruba lo informa pueblo si tin cualkier cambio.
