Proceso di keho

Por acudi na seccion Meldpunt ora bo tin pregunta tocante cuido of ora bo kier entrega un notificacion of un keho tocante cuido medico na Aruba. Meldpunt IVA su obhetivo ta pa ta un punto di acceso unda clientenan por acudi cu pregunta, notificacionnan y/of kehonan tocante e calidad di cuido ricibi. Seccion Meldpunt ta informa y guia clientenan pa e proceso di tratamento di keho por bay na un manera profesional y eficiente. Ademas, e registracion di keho y notificacionnan den cuido via Meldpunt ta genera informacion importante pa monitoria tendencianan. 

Seccion Meldpunt en principio no ta resolve keho, pero ta informa ciudadanonan di e pasonan cu nan por tuma. Conforme e Ordenansa Nacional Calidad di Cuido, e ta e responsabilidad di e dunado di cuido mes pa resolve kehonan. Pues, pa ley nan ta obliga di tin un maneho di keho y pa atende kehonan cu nan ta ricibi di nan pashent. Pa es motibo IVA ta conseha tur persona pa entrega un keho directamente cerca e dunado di cuido mes prome. Den e caso cu e dunado di cuido no a atende cu bo keho of cu bo no ta contento con e keho a wordo trata, por entrega un keho na IVA. Ademas, kehonan di e trabou di IVA mes (por ehempel con nos ta atende cliente, e manera di ehecuta un bishita di inspeccion, etc) tambe por wordo entrega na seccion Meldpunt. 

Con pa hace un pregunta of entrega un notificacion y/of keho

Pashentnan por entrega nan keho na e siguiente manera: online, telefonicamente of por escrito (email, whatsapp, via post). Si ta desea, por deposita un keho tambe por escrito den e brievenbus:

Informacion di contacto
Inspectie Volksgezondheid Aruba
Seccion Meldpunt IVA
Adres: Schotlandstraat 45, Oranjestad Aruba

Email: meldpunt@iva.aw
Telefon: +(297) 526 2166
Whatsapp: +297 593 6373
Fax: + (297) 588 2412

A base di e conversacion via telefon of e keho por escrito cu a wordo entrega, seccion Meldpunt ta dicidi si un cita ta necesario pa mas informacion. Ora ta trata un (probabel) calamidad, e notificacion lo wordo manda directamente pa e Inspector di Cuido di Salud (Inspecteur Gezondheidszorg).
 

Procedura di tratamento di un keho

E proceso di keho ta wordo splica akibou:

  1. Despues di e intake, e demandante ta wordo informa di tur e pasonan cu e por tuma. Si e demandante no a scirbi y entrega un carta di keho ainda, e funcionario di keho por mustra con pa haci esaki. E carta di keho aki hunto cu un carta di IVA lo wordo manda pa e dunado di cuido contra ken e keho a wordo entrega. 
  2. E funcionario di keho ta manda un carta na e dunado di cuido cu e nomber y informacion di contacto di e demandante y e carta di keho. Ora cu e dunado di cuido ricibi e carta, e periodo den cual e keho mester wordo trata ta cuminsa cana. E dunado di cuido ta obliga pa ley pa trata e keho. IVA ta vigila e proceso di keho y si e keho ta wordo trata dentro e periodo rekeri.
  3. Conforme e Ordenansa Nacional Calidad di Cuido, e cliente mester ricibi un contesta di e dunado di cuido dentro di 6 siman. Si acaso e dunado di cuido mester mas tempo pa atende cu e keho pa motibonan imprevisto, e periodo por wordo extendi cu 4 siman. Den e caso aki, e dunado di cuido mester notifica e demandante por escrito. En total, e periodo pa trata e keho por dura un maximo di 10 siman. 
  4. E dunado di cuido mester informa e funcionario di keho ora e keho a wordo trata y y con esaki a wordo haci. Banda di esaki, e demandante por informa e funcionario di keho tambe ora cu e ricibi un reacion di e dunado di cuido. Ora e demandante ta satisfecho con e keho a wordo trata, e keho ta wordo cera na e IVA y e dunado di cuido.

Pa yuda cu e proceso di entrega un keho, IVA ta duna ehempel di un carta di keho den Hulandes, Papiamento y Spaño cu por download akibou:

Notificacion anonimo

Ta posibel pa entrega un keho anonimo tambe via telefon. Den e caso aki, nos lo registra bo keho como un notificacion general sin informacion personal. E unico informacion cu nos lo registra ta e nomber di e dunado di cuido of instancia di cuido di cual e keho ta. E informacion aki lo wordo uza pa monitoria tendencianan. A base di e tendencianan aki, IVA ta scohe e areanan di vigilancia pa e aña(nan) siguiente.   

Documento 'Het Meldpunt IVA'

Informacion detaya tocante e procedura di keho por haya akinan den e documento: 'Het Meldpunt IVA: klachtenprocedure voor burgers'.