Kico nos ta haci?

Tareanan

Inspeccion di Salud Aruba (IVA) ta monitoria e cuido di salud na Aruba na un manera independiente. IVA ta consisti di dos seccion; e seccion di Cure & Care y e seccion di Remedi. 

E seccion di Cure & Care tin e tarea importante di supervisa dunadonan di cuido y di enforsa leynan di cuido. Tambe e seccion di Cure & Care ta duna conseho na e veld di cuido pa salvaguardia e calidad di cuido duna na Aruba. Na cabes di e seccion aki tin e Inspectora di Salud (Inspecteur Gezondheidszorg).

E seccion di Remedi (antes Inspectie Geneesmiddelen) ta salvaguardia e seguridad y calidad di remedi, kimico, arma kimico, narcotica y substancia psicotropico cu ta wordo importa. Pues, e seccion aki ta controla tur e remedinan cu ta drenta Aruba. Esaki tambe ta essencial pa salvagardia e calidad di cuido duna na Aruba. Na cabes di e seccion aki, tin e Inspectora di Remedi (Inspecteur Geneesmiddelen). 

IVA ta forma parti di e ministerio di Turismo, Salud Publico y Deporte. E tareanan di IVA ta describi akibou.

Informa

Pa IVA transparencia ta hopi importante. Esaki ta nifica cu informa pashent ta forma un parti grandi di nos organisacion. Nos ta informa pashent di nan derechonan y debernan y ta tene pashent na altura di desaroyonan y sondeonan haci den cuido na Aruba.

Monitoria

Como supervisor IVA ta monitoria tur dunadonan di cuido, instancianan di cuido y remedi na Aruba. Pues, IVA ta monitoria e calidad di cuido cu ta wordo duna, e remedinan y suplementonan cu ta wordo importa y tambe con dunadonan di cuido ta trata cu kehonan di pashent.

Controla

IVA ta supervisa a base di diferente ordenansa den cuido, por ehempel e Ordenansa Nacional di Calidad di Cuido (Landsverordening kwaliteit in de gezondheidszorg), e Ordenansa Profesionnan den Cuido (Landsverordening Beroepen in de gezondheidszorg) y e Ordenansa Nacional di Suministro di Remedi (Landsverordening op de Geneesmiddelenvoorziening).

Tratamento di kehonan y/of notificacionnan

IVA ta trata calamidad, ta registra keho y ta guia pashent ora di entrega un keho of notificacion. Tambe IVA ta controla si dunadonan di cuido en berdad ta trata kehonan cu nan ta ricibi. Dunadonan di cuido ta keda primordialmente responsabel pa e cuido cu nan ta duna, pero ora ta necesario, IVA ta tuma accion inmediatamente riba kehonan y/of notificacionnan ricibi. Por ehempel, ora tin un peliger inmediato pa e pashent.